هى الحياة حلوة .. لو بس نفهمها
وياريت ما نفهمهاش .. زى اللى راح ولا جاش
واللى قسى ، واللى نسى
واللى باع الضمير وربط الموت بعمدانها
تلقى كمان واحد .. بيوحد الواحد
لكن ظاهر الأمور مش زى باطنها
أصل الحياة دية .. مش عيشة أزليه
واللى يعيش ليها .. أبداً مالوش دية
عيش فيها على طبعك .. بكفاية بقى تمثيل
هما يدوبك يومين
ده قدرنا ماله بديل
وأعدل ما بين أمرين .. هايكونوا أخر القول
خليك صادق آمين .. و إوعاك يخونك قول
تانى الأمور هو .. الصبر ده قوة
عيش عيشة الخالديــــن
وماتنساهوش " هوَّ "
لا اله الا الله .. قنديل فى ظلامها
تلقى الحياة حلوة .. وتنور ايامها